هرات کې د زلزلې له امله زيانمن شوي تاريخي آبدات بيا رغول کيږي
یکشنبه (۷ د رمضان المبارک ۱۴۴۵) د هرات ولايت د اطلاعاتو او کلتور رئيس مولوي احمدالله متقي په افغانستان کې د آغاخان بنسټ له رئيس اجمل ميوندي سره وکتل.
د ليدنې په ترڅ کې د اطلاعاتو او کلتور رئيس مولوي احمدالله متقي وويل: د ا.ا.ا. د تاريخي آبداتو ساتنې ته جدي توجه کوي، همکارې موسسې باید د تاريخي آبداتو د بیا رغونې په برخه کې دوامداره همکاري ولري، همدا راز نوموړي د پنځم منار د بيارغونې د کارونو په تيزوالي تاکيد وکړ.
د آغاخان بنسټ رئيس اجمل ميوندي وويل: هڅه کوو، چې د هرات ولايت اوله درجه تاريخي آبدات بيا ورغوو، دا مهال د هوکړه ليک له مخې د ياد ولايت د جامع مسجد ايوانونه، د ګذرګاه شريف کاشي، او د نورو مساجدو ترميم تر کار لاندې دي، چې په تخصصي ډول به د زلزلې له امله د زيانمن شويو تاريخي آبداتو بيارغونه وشي.
د يادونې وړ ده چې د هرات ولايت د اختيارالدين کلا، جامع مسجد، ګذرګاه شريف او منارونه د مهمو تاريخي آبداتو څخه دي، چې نړيوال شهرت لري.
