تخار کې د ( کتاب او مطالعې سره د ژوند طریقه ) عنوان لاندې غونډه ترسره شوه
تېره ورځ د تخار ولايت د اطلاعاتو او کلتور رياست د ځوانانو چارو آمريت او آرين ښوونيز مرکز له لوري د ياد رياست د غونډو په تالار کې د دولتي ادارو د مسؤلينو او استازو، د ښوونيزو مرکزونو د زده کوونکو او سلګونه ځوانانو په شتون کې د ( کتاب او مطالعې سره د ژوند طريقه) تر نامه لاندې غونډه ترسره شوه.
د اطلاعاتو او کلتور رياست د ځوانانو چارو آمر مولوي عین الدين مطمين وويل: مطالعه د اهدافو د ترلاسه کولو لپاره بهترينه لاره ده، او ټينګار يې وکړ چې ځوانان باید داسې اهداف ځانته غوره کړي چې هم په خپل سلوک او رفتار کې مثبت تغيرات راولي او هم د ټولنې د پرمختګ باعث شي.
ورپسې د غونډې نورو ګډونوالو هم په خپل وار سره د کتاب او مطالعې پر ارزښت او ګټو خبرې وکړې.
۱۴۴۵/۶/۲۴ هـ ق
۱۴۰۲/۱۰/۱۶ هـ ش
