د اطلاعاتو او کلتور رياست اونيزه اداري غونډه ترسره شوه
نن شنبه (۱۸ د جمادي الاول ۱۴۴۵) د بدخشان ولايت د اطلاعاتو او کلتور رياست اونيزه غونډه په کاري ساحه کې د جديت، د کارونو د بهبود او خپلو مسؤلیتونو ته د کارکوونکو د متوجه کولو په موخه د ياد ریاست د رئيس الحاج معزالدين احمدي په مشرۍ ترسره شوه .
یاده غونډه کې د بدخشان د اطلاعاتو او کلتور رئيس الحاج معزالدين احمدي کارکوونکي خپلو ورسپارل شويو دندو ته متوجه کړل، همدا ډول يې د راروان ژمي موسم څخه د ښې ګټې اخستنې لپاره له کارمندانو وغوښتل تر څو ځوانانو ته ټولنيزې او کلتوري غونډې ترتيب کړي، د تاريخي آثارو او تاريخي آبداتو څخه په ښه توګه څارنه او ساتنه وکړي، د بدخشان ولايت پېښو ته په ښه بڼه انعکاس ورکړي، دا چې د اطلاعاتو او کلتور رياست د خلکو او دولت ترمنځ د ارتباطي پل حیثیت لري، باید ددې رياست مسؤلين د کلتوري ودې، ملت ته د مسؤلينو د کارکرده ګۍ په برخه کې اطلاع رسونه، او ځوان قشر ته د عامه پوهاوي په برخه کې جدي فعاليتونه ترسره کړي.
نوموړي همدا ډول د خبريالانو، ولايت مقام او نورو مسؤلينو ترمنځ د خبري ناستو په جوړولو ټينګار وکړ، تر څو خلکو ته د ولايت په کچه د معلوماتو بهير ګړندی شي او خلک د معلوماتو په خلا کې واقع نه شي او اړوندو مسؤلينو ته يې د ا.ا.ا. د رهبرۍ د فرمانونو په عملي کولو ټينګار وکړ.
