بلخ کې ځوانانو د پخوا په پرتله مطالعې ته زیاته مخه کړې
د بلخ ولایت د اطلاعاتو او کلتور ریاست مسؤلین وایي، چې د پخوا په پرتله د ځوانانو ترمنځ د کتاب لوستلو یا مطالعه کولو علاقه زیاته شوې، د ورځې لسګونه ځوانان د بلخ ولایت عامه کتابتون ته مراجعه کوي او هلته په بېلابېلو برخو کې مطالعه کوي.
په دې اړه د بلخ ولایت د عامه کتابتونونو عمومي مدیر شفیع الله حیدري وایي، د پخوا په پرتله سږ کال د مطالعې سره د ځوانانو مینه او علاقه زیاته شوې ده، د ورځې شاوخوا ۲۰۰ تنه ځوانان د بلخ اطلاعاتو او کلتور ریاست او مولانا خسته عامه کتابتون ته مراجعه کوي او په بېلابېلو برخو کې کتابونه مطالعه کوي، د بلخ ولایت مولانا خسته عامه کتابتون کې ۲۰۰۰۰ زره جلده کتابونه شتون لري. د ښونځي او پوهنتون زده کونکي د خپلې خوښې او اړتيا په کچه ورڅخه استفاده کیږي.
ښاغلي حیدري د خپلو خبرو په دوام زیاته کړه، د بلخ عامه کتابتون دروازه د ټولو ځوانانو پرمخ خلاصه ده او له ټولو ځوانانو څخه یې غوښتنه وکړه، ترڅو د بې ځایه ناستو، بې ځایه کارونو، بې ځایه انټرنیټي مصروفیتونو او نورو مضرو شبکو څخه ډډه وکړي او د هغه پر ځای کتاب او مطالعې ته اولیت ورکړي، ترڅو یې ژوند او راتلونکی روښانه شي. هغه زیاتوي بلخ کې د عامه کتابتون ترڅنګ څه د باندې ۵۰ خصوصي کتابتونونه شتون لري او ځوانان ورڅخه استفاده کولای شي.
۱۴۴۵/۴/۱۰ هــ ق
۱۴۰۲/۸/۳ هـ ش
