د ملي راډیو تلوېزیون کارمندانو ته اصلاحي برنامه جوړه شوه
نن یکشنبه (۱۴۴۵/۳/۱۶ هـ ق) د اطلاعاتو او کلتور وزارت د دعوت او ارشاد رئیس مولوي حاجي محمد طیب صاحب له لوري د خپلو ورځنیو اصلاحي برنامو پر دوام، د ملي راډیو تلویزیون کارمندانو ته اصلاحي برنامه جوړه شوه، چې پر مهال یې د ملي راډیو تلویزیون رئیس قاري محمد یوسف احمدي، د امر بالمعروف وزارت استازي او د ملي راډیو تلویزیون اداري کارمندانو شتون درلود.
مولوي حاجي محمد طیب صاحب د امر بالمعروف او نهي عن المنکر اصلي موخه د ولس لپاره اصلاحي بیانونه او د دوی د دنیا او آخرت نیکمرغي وبلله، ورپسې یې د خپلو خبرو پر مهال په څلورو لاندې موضوعاتو بحث وکړ.
اطاعت، د سنتو اتباع، حجاب او تدریسي نصاب.
د دعوت او ارشاد رئیس په خپلو خبرو کې خلک د امير د امر منلو او اطاعت ته راوبلل.
ورپسې یې د ملي راډیو تلویزیون پر کارمندانو ټینګار وکړ، چې ځانونه د حضرت محمدﷺ پر سیرت او صورت برابر کړئ، څو مو دنیا او آخرت ښایسته شي.
همدارنګه یې د حجاب د ارزښت پر اړه د قرآنکریم او احادیثو په رڼا کې خبرې وکړې.
د غونډې په وروستۍ برخه کې یې پر هغه نصاب خبرې وکړې چې د امر بالمعروف او نهي عن المنکر وزارت له لوري د ټولو حکومتي ادارو کارمندانو ته چمتو شوی و او همدا راز یې د دغې ادارې کارمندان دیني او عصري زده کړو ته وهڅول.
د یادونې وړ ده، د اطلاعاتو او کلتور وزارت د دعوت او ارشاد ریاست له لوري د یاد وزارت اتلس ریاستونو ته اصلاحي بیانونه شوي او دا لړۍ لا روانه ده.
