د ننګرهار عامه کتابتون سره د ۸ سوه ټوکه بېلابېلو کتابونو مرسته وشوه
نن یکشنبه (۱۴۴۴/۱۰/۲۴ هـ ق) د ننګرهار عامه کتابتون او راشئ ولولئ کتابتون سره د لیکوال او ژورنالېست باز محمد عابد له لوري د ۸ سوه ټوکه بېلابېلو برخو کتابونو مرسته وشوه.
د ننګرهار اطلاعاتو او کلتور ریاست د فرهنګ آمر امرالله امید عامه کتابتون ته د دغې کتابونو له ورکړې مننه وکړه او پر نورو فرهنګ پالو یې غږ وکړ، چې خپل اضافي کتابونه د عامه لوستنې لپاره دې کتابتون ته په واک کې ورکړئ.
د ننګرهار عامه کتابتون مسؤل ضیاءالدین همت مل، بیا خلک دې کتابتون ته د لوستنې او مطالعې لپاره وبلل او ډاډ یې ورکړ، چې راشئ ولولئ کتابتون دروازې هر وخت د لوست د مینوالو لپاره خلاصې دي.
د یادولو وړ ده چې د ننګرهار عامه کتابتون راشئ ولولئ کتابتون کې له ۱۵ څخه تر ۲۰ زرو پورې ادبي، کلتوري، سیاسي، عملي او نور بېلابېل ډوله کتابونه د مطالعې د مینوالو لپاره شتون لري، چې هره ورځ ترې د لوست مینوال د خپلو معلوماتو د بډاینې لپاره ګټه پورته کوي.
