خلک دې د ملي شتمنۍ په توګه له فرهنګي ځایونو او تاریخي آبداتو ساتنه وکړي
یادې څرګندونې نن یک شنبه ۱۴۴۴/۹/۱۸ هـ ق د بغلان ولایت د اطلاعاتو او کلتور ریاست رئیس مولوي اسدالله مصطفی هاشمي او د اطلاعاتو او کلتور وزارت د فرهنګي آثارو د سروې او ثبت د برخې راغلي پلاوي د دې ولایت د اندراب درې ګونو ولسوالیو ته د سفر په ترڅ کې وکړې.
د بغلان د اطلاعاتو او کلتور رئیس مولوي اسدالله مصطفی هاشمي د بنو، پلحصار او دهصلاح ولسوالیو له اوسېدونکو څخه وغوښتل چې د هیوادني او ټولنیز مسؤلیت له مخې دې، د ملي شتمنۍ په توګه له فرهنګي ځایونو اوتاریخي آبداتو څخه ساتنه وکړي.
ښاغلي هاشمي ولسي خلکو ته په دې ولسوالیو کې ټينګار وکړ چې د فرهنګي او لرغونو ځايونو د ساتنې په برخه کې دې لاس سره ورکړي، څو د اندراب په درې ګونو ولسوالیو کې شته کلتوري ځایونه د ملي پانګې په توګه د غصب او نړېدو له ګواښ څخه خوندي پاتې شي.
په ورته مهال مېشتو ولسي او ځايي مشرانو ټينګار وکړ چې په پوره ژمنتیا سره به هڅه کوو چې په بنو، دهصلاح او پلحصار ولسوالیو کې شته تاریخي آبدات، کلتوري او لرغوني ځایونه وساتو او د هغو کسانو مخنیوی به وکړو چې د فرهنګي ځایونو د تخریب او یایې هم په څنډو کې د کیندنو هڅه کوي.
