د فاریاب په اقتصادي ودې کې د فرهنګي میراثونو رول) په نوم غونډه وشوه
د اطلاعاتو او فرهنګ وزارت اړوند د خلکو د فرهنګ ریاست له لوري د فاریاب د اطلاعاتو او فرهنګ ریاست په همکارۍ (د فاریاب په اقتصادي ودې کې د فرهنګي میراثونو رول) په نوم غونډه وشوه، چې پکې د سیمه ییزو ادارو یو شمېر مسوولینو، د فاریاب پوهنتون استادانو او د دې ولایت ګڼ شمېر اوسېدونکو ګډون کړی و.
د خلکو فرهنګ رئیس په دې غونډه کې د ټولنو په تاریخي او ټولنیز هویت کې د فرهنګ د ارزښت په اړه خبرې وکړې او ویې ویل: فرهنګي میراثونه د تاریخي او معنوي ارزښتونو ترڅنګ دا وړتیا هم لري، چې د سیاحت د ودې، اقتصادي فرصتونو د رامنځته کولو او د هېواد د سیمه ییزو شتمنیو د معرفي کولو په برخه کې ترې ګټه واخیستل شي.
نوموړي زیاته کړه؛ چې د فرهنګي میراثونو ساتنه یوازې د حکومتي ادارو مسوولیت نه دی، بلکې عام وګړي، فرهنګیان، لیکوالان او ځوان نسل هم د دې ارزښتمنو شتمنیو د ساتنې مسوولیت لري.
همدارنګه د خلکو فرهنګ رئیس د فرهنګیانو د اثارو د ثبت او خپرولو، د تاریخي آبداتو د ساتنې او پالنې او په ټول هېواد کې د ګرځندوی فرهنګ د پراختیا په برخه کې د یاد وزارت د ژمنتیا ډاډ ورکړ او د فرهنګي او د تاریخي شتمنیو په معرفي کولو او مستند کولو یې ټینګار وکړ.
د غونډې په لړ کې د فاریاب د اطلاعاتو او فرهنګ ریاست په استازیتوب د ځوانانو چارو آمر د غونډې د موضوع په اړه معلومات وړاندې کړل او د مشرتابه(حفظه الله) له لوري د صادر شوي ۱۷مې ګڼې فرمان محتوا یې له ګډونوالو سره شریکه کړه.
دغه راز د فاریاب پوهنتون استاد اشرف شریفي او استاد بشیر احمد معصومي او لیکوال او فرهنګي فعال محمد اسحاق شمسي د فاریاب د تاریخي مخینې، فرهنګي ارزښتونو، د تاریخي میراثونو د مقام او د دې ولایت د تاریخي آبداتو د ساتنې او ملاتړ د اړتیا په اړه خپلې مقالې او څېړنیز مطالب وړاندې کړل.
ګډونوالو هم د فاریاب د فرهنګي میراثونو د ساتنې او معرفي کولو پر اهمیت ټینګار وکړ او له اطلاعاتو او فرهنګ وزارت څخه یې وغوښتل، چې د شاعرانو د شعرونو د چاپ او د دې ولایت د تاریخي اثارو د ثبت او مستند کولو لپاره اړین اقدامات ترسره کړي.
د غونډې په پای کې د اطلاعاتو او فرهنګ وزارت د استازي له لوري یو شمېر مشرانو ته ستاینلیکونه هم ورکړل شول.
۱۴۴۸/۵/۱۲ هـ ق
