سمنګان کې د سیرت النبي(ﷺ) د کتاب لوستنې سیالۍ مخکښ ګډونوال وستایل شول

د سمنګان د اطلاعاتو او فرهنګ ریاست له لوري د البرز علمي او فرهنګي ادارې په همکارۍ د سیرت النبي(ﷺ) د کتاب لوستنې سیالي چې د رسول الله(ﷺ) له سیرت او اخلاقو سره د ځوانانو لا ښه بلدتیا په موخه ترسره شوې وه، پایلې یې اعلان او مخکښ ګډونوال یې وستایل شول.
د سمنګان د اطلاعاتو او فرهنګ رئیس مولوي فیروزالدین منیب د اسلام د ستر پیغمبر(ﷺ) د سیرت مطابق د ژوند برابرولو پر اهمیت ټینګار وکړ او ویې ویل: که ځوانان نبوي سیرت لارښوونې د خپل ژوند تګلاره وګرځوي، نه یوازې به د دنیا او آخرت د نېکمرغۍ پر لاره روان شي، بلکې د داسې ټولنې لپاره به هم بېلګه وګرځي چې له اخلاقو، عدالت او انساني ارزښتونو څخه برخمنه وي.
ورته مهال د یادې سیالۍ ګډونوالو د داسې فرهنګي او دیني پروګرامونو له جوړېدو خوښي څرګنده کړه او غوښتنه یې وکړه، چې په راتلونکې کې دې هم ورته علمي، فرهنګي، دیني او ښوونیز پروګرامونه جوړ شي.
د یادونې وړ ده، چې د یادې سیالۍ لومړي مقام ګټونکي ته یو پایه لپ‌ټاپ کمپیوټر، د دویم مقام ګټونکي ته یو سیټ موبایل، د درېیم مقام ګټونکي ته الفجر ساعت او نورو بریالیو ګډونوالو ته بېلابېلې ډالۍ ورکړل شوې.

۱۴۴۸/۱/۲۱ هـ ق