د کتاب لوستنې او مطالعې دود عامولو په موخه یو ورځنی روزنیز سیمینار ترسره شو
د اطلاعاتو او فرهنګ وزارت اړوند د عامه کتابتونونو ریاست او د کاپیسا اطلاعاتو او فرهنګ ریاست په ګډو همکاریو د کتاب لوستنې او مطالعې دود عامولو په موخه د کاپیسا اطلاعاتو او فرهنګ ریاست د غونډو په تالار کې یو ورځنی روزنیز سیمینار ترسره شو، چې په کې د عامه کتابتونونو مسؤلینو، د کاپیسا اطلاعاتو او فرهنګ ریاست مسؤلینو، لیکوالانو او ګڼ شمېر ځوانانو ګډون کړی و.
د عامه کتابتونونو رئیس دوکتور رفیع الله صمیم د اسلام سپیڅلي دین د لارښونو په رڼا کې د کتاب، مطالعې او کتابتونونو د ارزښت په اړه خبرې وکړې او زیاته یې کړه؛ چې د اسلام په تاریخ کې کتاب، کتابتون او علم ته ځانګړې پاملرنه شوې وه او د عامه کتابتونونو اداره د مطالعې او کتاب لوستنې فرهنګ د پراختیا لپاره بېلابېل پروګرامونه ترسره کوي.
ښاغلي صمیم له ټولو لیکوالانو، څیړونکو او ځوانانو څخه وغوښتل چې راځئ په حقیقي معنا علم ته مخه کړو او څیړنې، کتاب لوستنې او د لیکوالی په برخه کې کار وکړو، ترڅو نور له ناخوالو خلاص او هېواد مو په ټولو برخو کې پر ځان بسیا شي.
دغه راز د کاپیسا اطلاعاتو او فرهنګ رئیس او د مرکزي عامه کتابتونونو آمر د سیمينار ګډونوالو ته د ښه راغلاست ترڅنګ د کتاب لوستنې او مطالعې په اړه خبرې وکړې او زیاته یې کړه، چې د دغه سیمینار موخه په ټولنه کې د مطالعې فرهنګ عامول او ځوان نسل ته د هیواد تکړه لیکوالانو او څیړونکو ورپیژندل دي.
د مرکزي عامه کتابتونونو آمر په وینا؛ اوس مهال د هېواد په کچه ۱۰۹ بابه عامه کتابتونونو فعال دي او ټول هېوادوال کولای شي، چې په ورځنی توګه له یادو عامه کتابتونونو څخه د مطالعې، لیکنو، څیړنو او علمي پرمختګ په موخه ګټه واخلي.
د سیمینار ګډونوالو د دغه سیمینار له جوړولو څخه مننه وکړه او زیاته یې کړه، چې د کتاب لوستنې او مطالعې دود پیاوړتیا او پراختیا په موخه دې ورته پروګرامونو د ولایت د مرکز ترڅنګ په ولسوالیو کې هم جوړ شي.
د یادونې وړ ده، چې تر دې وړاندې هم د عامه کتابتونونو ریاست له لوري د کتاب لوستنې او مطالعې دود عامولو په موخه بېلابېلو ولایتونو کې روزنیز سیمینارونه ترسره شوي دي.
١٤٤٨/١/٦ ه ق
