هرات کې په لاس لیکل شوی قرآنکريم نندارې ته وړاندې شو
د هرات اطلاعاتو او کلتور ریاست له لوري د ترکیې د همکاریو آژانس د دفتر په همکارۍ د کلتوري نندارتون په لړ کې او د ترکیې هېواد سفیر په شتون کې په نستعلیق خط په لاس لیکل شوی قرانکریم نندارې ته وړاندې شو.
د نندارتون مسؤلينو وویل: دا قرآن کريم د ۱۶ مياشتو په موده کې د ښځينه خطاطانو له خوا ليکل شوی دی.
د هرات د خطاطانو ټولنې رئيس عبدالجليل توانا وویل: دغه اثر لومړنی بشپړ قرآنکریم دی، چې په ځانګړي هنري سبک سره ليکل شوی دی.
د اطلاعاتو او کلتور رياست مسؤلینو زیاته کړه، چې دغه نندارتون کې د یاد قرانکریم ترڅنګ د خطاطۍ هنري نږدې سل نور اثار هم نندارې ته وړاندې شوي دي.
ورته مهال د ترکيې سفير د دې نندارتون د ليدنې پر مهال د ترکیې هېواد له لوري د کلتوري او هنري پروګرامونو د ملاتړ ډاډ څرګند کړ او دا ډول نوښتونه يې د دواړو هېوادونو ترمنځ د کلتوري اړيکو د پياوړتيا لپاره مهم ګام وباله.
نندارتون کې ګډونوالو هنرمندانو وویل: د دې ډول فرصتونو برابرېدل د خطاطۍ د هنر د ودې او خلکو ته د هنري اثارو د پېژندنې لامل کیږي، هنرمندانو له اړوندو ادارو څخه د لا زياتې همکارۍ غوښتنه وکړه.
د يادونې وړ ده، چې دغه نندارتون به څلور ورځې دوام وکړي، چې دوه ورځې يې د ښځو او دوه ورځې يې د نارينه وو لپاره ځانګړې شوي دي.
۱۴۴۷/۱۰/۲۷ هـ ق
