ننګرهار کې (په اسلامي ټولنه کې د مسلمان شاعر او ترانه ویونکي مسؤليت) په نامه روزنیز سیمینار ترسره شو
د ننګرهار ولایت د اطلاعاتو او کلتور ریاست له لوري (په اسلامي ټولنه کې د مسلمان شاعر او ترانه ویونکي مسؤليت) په نامه یو ورځنی روزنیز سیمینار ترسره شو، چې پکې د اطلاعاتو او کلتور وزارت د ترنم او ترانو رئيس مولوي امان الله مستغفر، د یو شمېر امارتي ادارو مسؤلینو، د پوهنتون استادانو، شاعرانو، ترانه ویوونکو او لیکوالانو ګډون کړی وو.
د اطلاعاتو او کلتور رئیس مولوي ذبیح الله نوراني وويل: شاعر باید د خپل دین، کلتور او اسلامي نظام ارزښتونو استازيتوب وکړي او په خپل شعر کې داسې الفاظ وکاروي، چې د خلکو او نظام د ویاړ سبب شي.
دغه راز د اطلاعاتو او کلتور وزارت د ترنم او ترانو رئیس مولوي امان الله مستغفر ګډونوالو ته په خپلو خبرو کې وویل: د ویاړ ځای دی، چې د علم او ادب په ټاټوبي (ننګرهار) کې د شاعرانو او ترانه ویوونکو د مسؤلیتونو په اړه سېمینار جوړېږي، لیکوالان او شاعران باید د خپل دین اړتیاوې او ارزښتونه تل په پام کې ولري او خپل مسؤلیت وپېژني.
د ښاغلي مستغفر په وینا شعر او شاعري په اسلامي تاریخ کې لوړ مقام لري، د همدې اهمیت له مخې عالیقدر امیرالمؤمنین(حفظه الله) د مشاعرو تنظیم قانون صادر کړ او لیکوالان، شاعران او ترانه ویونکي د یاد فرمان په پلي کولو کې مکلف دي.
د سیمینار په لړ کې ویناوالو په اسلامي ټولنه کې د مسلمان شاعر او ترانه ویونکي مسؤليت په اړه هر اړخیزې خبرې وکړې او دغه ډول پروګرامونه یې د شعر، شاعرۍ او پښتو ادب د پیاوړتیا لپاره ګټور وبلله.
په پای کې د اطلاعاتو او کلتور ریاست له لوري یو شمېر لیکوالانو او شاعرانو ته د ستاینلیکونو ورکولو ترڅنګ ټولو ګډونوالو ته د مشاعرو د تنظيم قانون په چاپي بڼه ووېشل شول.
۱۴۴۷/۶/۲۰ هـ ق
