د عامه کتابتونونو رئیس له یو شمېر خپرندویانو سره ناسته وکړه
د اطلاعاتو او کلتور وزارت اړوند د عامه کتابتونونو رئیس دوکتور رفیع الله صمیم له یو شمېر خپرندویانو سره په خپل کاري دفتر کې وکتل.
خپرندویانو د خپلو ستونزو او فعالیتونو په اړه خبرې وکړې او د عاليقدر امیرالمؤمنین حفظه الله تعالی د هغه فرمان په اړه یې خوښي څرګنده کړه، چې له مخې یې پر کتابونو مالیه معاف شوې ده، دوی غوښتنه وکړه، چې د نویو کتابونو په پېرودلو کې دې په هېواد کې چاپ شویو کتابونو ته لومړیتوب ورکړل شي.
د عامه کتابتونونو رئیس دوکتور رفیع الله صمیم وویل: په هېواد کې د کتابونو خپرندویانو تل خپل کارونه په ښه او صادقانه توګه ترسره کړي او معنوي ارزښتونو ته یې پر مادیاتو لومړیتوب ورکړی دی.
ښاغلي صمیم ډاډ ورکړ، چې د عامه کتابتونونو ریاست به د کتابونو پېرودلو پر مهال په هېواد کې چاپ شویو اثارو ته لومړیتوب ورکړي، د عامه کتابتونونو اداره تل هڅه کوي، چې د لیکوالانو او خپرندویانو فعالیتونه وستایي، ترڅو په هېواد کې د کتاب لیکلو او خپرولو لړۍ لا پراخه شي.
۱۴۴۷/۲/۱۰ هـ ق
