د رسنيو له مسؤلینو او خبريالانو سره د همږغۍ ناسته وشوه
په لغمان ولایت کې د اطلاعاتو او کلتور ریاست په هڅو د بېلابېلو رسنیو مسؤلینو او خبریالانو د لغمان والي شیخ شیراحمد حقاني سره وکتل، په دې ناسته کې د ختیځ زون د خبریالانو د خوندیتوب کمیټې مشر، د لغمان د خبریالانو د خوندیتوب کمیټې مشر، د ملي راډیو تلویزیون آمر، او یو شمېر خبریالانو ګډون کړی و.
د غونډې پیل د اطلاعاتو او کلتور رئیس مولوي عبدالنور رسولي په وینا وشو، نوموړي د لغمان ولایت د رسنیو او رسنیزو فعالیتونو په اړه معلومات وړاندې کړل او ويې ویل: په لغمان کې رسنیز فعالیتونه په ښه حالت کې دي، خبریالانو ته پر وخت معلومات رسیږي، خو د لا ښه والي لپاره باید نورې هڅې هم وشي.
ورپسې د رسنیو یو شمېر مسؤلینو او خبریالانو خپلې غوښتنې او وړاندیزونه د لغمان والي سره شریک کړل، هغوی غوښتنه وکړه، چې د پروژو د پرانېستلو او ګټې اخیستنې پر مهال دې خبریالانو ته له مخکې خبر ورکړل شي، ترڅو د دغو موضوعاتو سم او پر وخت انعکاس وشي، همدارنګه، د همغږۍ میاشتنۍ غونډې دې جوړې شي ترڅو د خبریالانو ستونزې او غوښتنې مسؤلینو ته په مستقیم ډول وړاندې شي.
د لغمان والي شیخ شیراحمد حقاني د ګډونوالو غوښتنې واورېدې او ډاډ یې ورکړ، چې د خبریالانو ستونزو ته به په وخت رسېدنه وکړي، هغه وویل: چې رسنۍ د نظام د کړنو او لاسته راوړنو په رسولو کې اساسي رول لري او حکومت یې ملاتړ کوي.
ښاغلي حقاني خبریالانو ته سپارښتنه وکړه، چې د حقایقو پر بنسټ راپورونه خپاره کړي او د مغرضو او تخریبوونکو رسنیو پر وړاندې دې خپلې ملي رسالت ترسره کړي.
۱۴۴۶/۶/۲ ھ ق
۱۴۰۳/۹/۱۴ ھ ل
