ننګرهار کې د غږیزو رسنیو مسلکي ارزونه پیل شوه
د ننګرهار ولايت د اطلاعاتو او کلتور ریاست د اطلاعاتو آمر وايي: دغه ولایت کې ټولې غږیزې رسنۍ په مسلکي ډول ارزیابي کیږي، ترڅو شته نیمګړتیاوې یې تشخیص او د اصلاح په برخه کې ورسره همکاري وشي.
نوموړي زیاته کړه؛ د غږيزو رسنیو د خپرونو مهال وېش، د کارکوونکو تشکیلات، د خپرونو محتوا او د رسنیو همکاري د دغې ارزونې مهمې برخې دي.
د نوموړي په وینا؛ له دې ارزونې يې موخه دا ده، چې د غږيزو رسنیو فعالیتونه معیاري، د کارکوونکو مسلکي وړتیاوې لوړې او د رسنیو ستونزو ته واقعي حل لارې وموندل شي، ټولو رسنیو ته سپارښتنه شوې، چې د اسلامي امارت د نافذه قوانینو تر چتر لاندې داسې محتوا خپره کړي، چې له ټولنیزو ارزښتونو سره په ټکر کې نه وي او خلکو ته مثبت الهام او زده کړه ورکړي، ادبي، ټولنیزې او نورې خپرونې باید د ټولنې له دیني، اخلاقي او کلتوري اساساتو سره سمون ولري او رسنۍ باید له نومونو څخه د محتوا د پټولو لپاره ناوړه استفاده ونه کړي.
نوموړي دا هم وویل: چې د اطلاعاتو او کلتور ریاست به د رسنیو اقتصادي ستونزو ته مناسبې حل لارې پیدا او هڅه به وکړي، چې د رسنیو د پیاوړتیا لپاره د ملاتړ کوونکو جذب ته زمینه برابره کړي.
۱۴۴۶/۱۲/۴ هـ ق
