اطلاعاتو او کلتور رياست د خصوصي او امارتي رسنيو له مسؤلینو سره د همږغۍ مياشتنۍ ناسته وکړه
د بلخ ولايت د اطلاعاتو او کلتور رياست له لوري د خصوصي او امارتي رسنيو له مسؤلينو او خبريالانو سره د همږغۍ ناسته وشوه.
د اطلاعاتو او کلتور رئيس مولوي محمدالله ضرار د همږغۍ ناستو پر ارزښت خبرې وکړې او د چارو د ښه سمون او ستونزو د حل په موخه يې دا ډول ناستې مهمې وبللې.
ښاغلي ضرار وویل: لله الحمد اسلامي نظام نافذ شوی، د اسلامي امارت مشرتابه عالیقدر امیرالمومنین حفظه الله تعالی د ولس هرې ستونزې ته متوجه دی او ولس ته آسانتياوو د رامځته کولو لپاره یې ځانګړي فرمانونه صادر کړي، چې تر ټولو مهم یې د بې ځایه مصارفو د کمولو فرمان دی.
نوموړي په ټولنه کې د ناوړه دودونو د مخنيوي په موخه د عالیقدر امیرالمومنین حفظه الله د فرمان په هکله هر اړخیز معلومات وړاندې کړل او دغه فرمان چې په ټولنه کې د ودونو، ناوړه رواجونو، حج او عمرې وروسته رواجونو د له منځه وړلو په برخه کې راغلی دی، خورا مهم او ارزښتمن يې وباله.
خبریالانو او د رسنيو مسؤلينو وويل: حکومت باید په مختلفو برخو کې د رسنيو ملاتړ وکړي او د اداراتو د اطلاعاتو برخې مسؤلين باید اطلاعاتو ته د لاسرسي په برخه کې رسنیو ته نورې اسانتياوې هم رامنځته کړي.
د ناستې په وروستۍ برخه کې خبریالانو خپلې ستونزې د بلخ ولايت د اطلاعاتو او کلتور رئیس سره شريکې کړې، چې د نوموړي لخوا د هر ډول همکارۍ ډاډ ورکړل شو.
۱۴۴۶/۱۱/۱۷ هـ ق
