د روغتيايي زده کړو برخه کې د ګډې همکارۍ او تخفیف هوکړه لاسليک شوه
د پکتيکا ولايت د اطلاعاتو او کلتور رياست د ځوانانو چارو آمریت او د ډاکتر عبدالکبير روغتيايي علومو انسټيټيوټ په بېلابېلو روغتيايي برخو کې د ځوانانو د ښه راتلونکي په پار د ګډو همکاريو او تخفيف په موخه هوکړه لاسليک کړه.
د ياد هوکړه ليک پر اساس د ځوانانو چارو آمريت له لوري (۵۰) تنه ور پېژندل شوي ځوانان کولای شي، چې د درېيو سمسترونو په دوران کې په (۲۵) سلنه تخفيف سره په عالي نرسېنګ، عالي لابراتوار، غاښونو څانګه او فارمسي برخو کې زده کړې وکړي.
د اطلاعاتو او کلتور رئيس مــلا محمد امين حذيفه د ياد هوکړه ليک د لاسليک له امله د یاد انسټيټيوټ له ادارې مننه وکړه او په ځوانانو يې غږ وکړ، چې له یاد فرصت څخه ګټه واخلي او زده کړې ترسره کړي.
د یادونې وړ ده، چې د اطلاعاتو او کلتور ریاست تر دې وړاندې هم د هوکړه ليکونو په اساس لسګونه تنه ځوانان ښوونيزو مرکزونو ته ور پېژندلي دي.
۱۴۴۶/۱۰/ ۹ ق
۱۴۰۴/۱/۱۸ ل
