دایکندي کې د ناوړه رواجونو د مخنیوي په موخه یو ورځنی سمینار جوړ شو
د دایکندي ولایت د اطلاعاتو او کلتور ریاست د ځوانانو چارو آمریت د منار علمي، فرهنګي او خپرنیزې ادارې په همکارۍ ( د ناوړه رواجونو د مخنیوي) تر سرلیک لاندې یو ورځنی سمینار جوړ کړ، چې شاوخوا ۲۰۰ تنه ځوانانو پکښې ګډون درلود.
د اطلاعات او کلتور رئیس قاري آغا ولي قریشي د سمینار ګډونوالو ته هرکلی ووایه او د ناوړه رواجونو مخنیوی یې د ټولنې د اصلاح مهم ګام وباله.
ښاغلي قریشي وویل: ځوانان د ټولنې مهم قشر ده او د شریعت او اسلامي قانون پر بنسټ خپل ملي او مذهبي مراسم ترسره کول او د بې ځايه لګښتونو څخه مخنیوی کول يې مسؤليت دی.
ورپسې دیني عالم محمد حسین مهدوي، د امربالمعروف او نهی عن المنکر رياست محتسب سید روح الله ګوهري او مولوي محمد هم د عالیقدر امیرالمؤمنین حفظه الله د فرمان له مخې د ناوړه رواجونو د مخنیوي په اړه د سمينار ګډونوالو ته معلومات وړاندې کړل او مهمې سپارښتنې يې وکړې.
۱۴۴۶/۱۲/۵ هـ ق
