د زرنج ښار له یو شمېر ځوانو ترنم ویونکو سره د همږغۍ ناسته وشوه
د نیمروز ولایت د اطلاعاتو او کلتور د رئیس الحاج مفتي حبیبالله الهام په مشرۍ د کلتوري پروګرامونو د پراختیا او په دې برخه کې د لا زیاتو خدمتونو د ترسره کولو په موخه د زرنج ښار له یو شمېر ځوانو ترنم ویونکو سره د همږغۍ ناسته وشوه.
د اطلاعاتو او کلتور رئيس د یادې غونډې ګډونوالو ته د ښه راغلاست ترڅنګ وويل: د ټولنې د کلتوري ودې په ځانګړې توګه د ترنم لپاره باید په ګډه کار وکړو، هڅه مو کړې ده، چې د ټولو کلتوري قشرونو لپاره پروګرامونه ترتیب کړو، ترڅو له دوی څخه ملاتړ وکړو او هغوی وهڅوو، په دې برخه کې تاسو د ځوانانو د استعدادونو د هڅولو او کشفولو لپاره د ترنم د سیالیو شاهدان یاست.
د غونډې ګډونوالو د نيمروز ولايت د اطلاعاتو او کلتور رياست له فعاليتونو څخه د مننې ترڅنګ د ترنم په برخه کې خپل وړانديزونه او نظرونه وړاندې کړل، چې د اطلاعاتو او کلتور رئيس هم د کلتوري پروګرامونو د ښه والي لپاره د دوی وړاندیزونه واورېدل او ژمنه یې وکړه چې دې برخه کې به هیڅ راز هڅه ونه سپموي.
۱۴۴۶/۹/۱۷ ق
۱۴۰۳/۱۲/۲۷ ل
