په زابل کې د حکومت او رسنیو مسوولینو ترمنځ د همغږۍ ناسته وشوه
د زابل ولایت د مرستیال والي مولوي محب الله حماس په مشرۍ، د اطلاعاتو او کلتور رئیس، د خبریالانو د خوندیتوب کمېټې ولایتي مسوول، حکومتي مسوولینو، د رسنیو مسوولینو او خبریالانو سره د همغږۍ غونډه وشوه.
په پیل کې د زابل د اطلاعاتو او کلتور رئیس مولوي رحمت الله حماد وویل: زابل کې موجود خبریالان نظام او د نظام پالیسي ته ژمن دي او تل یې د نظام کړنو ته خورا ښه انعکاس ورکړی، نوموړي د رسنیو د استازو او خبریالانو څخه وغوښتل، چې خپلو چارو ته لا متوجې شي او خپل نشرات په داسې ډول ترسره کړي، چې د نظام ملاتړ او د ټولنې ګټه په کې نغښتې وي.
ورپسې د خبریالانو د خوندیتوب کمېټې ولایتي مسوول عصمت الله عمري وویل: د مسوولینو له لوري معلوماتو ته د لاسرسي په برخه کې لا اسانتیاوې رامنځته شوې، د الله تعالی په فضل کومه منفي پېښه نه لرو او د رسنیو، خبریالانو او ادارو تر منځ همغږي لا ډېره شوې ده، چې دا یوه لویه لاسته راوړنه ده.
په پای کې د زابل مرستیال والي ښاغلي حماس د خبریالانو هڅې وستایلې او له خبریالانو څخه یې وغوښتل چې د نظام کړنو او فعالیتونو د لا ښه انعکاس ورکولو په موخه خپلې هڅې لا نوري ګړندۍ کړي، همدارنګه یې د رسنیو او خبریالانو ستونزې او مشکلات واورېدل او د اړوندو مسوولینو سره شریک کړل او د حل ژمنه یې وکړه.
۱۴۰۳/۱۰/۲۰ه ل
۱۴۴۶/۷/۸ هـ ق
