بلخ کې د اسلام پاله ځوانانو، محصلینو، استادانو او د دولتي ادارو د وياندویانو ترمنځ د همږغۍ ناسته وشوه
د بلخ ولایت په اطلاعاتو او کلتور ریاست کي د یاد رياست د رئيس مولوي ذبيح الله نوراني، د ولايت مقام د وياند او د ۲۰۹ الفتح قول اردو د ویاند په ګډون د بلخ اسلام پاله ځوانانو، محصلینو او استادانو ترمنځ د همږغۍ میاشتنۍ غونډه ترسره شوه، چې پر یو شمېر مهمو لاسته راوړنو او د نظام د پرمختګونو اړوند مشورې، نظرونه او د مثبتو لاسته راوړنو د انعکاس اړونده بحث او خبرې اترې وشوې.
د اطلاعاتو او کلتور رياست رئيس مولوي ذبيح الله نوراني ټولو ګډونوالو ته ښه راغلاست ووایه او زیاته یې کړه؛ د دین او اسلام دښمنان تل هڅه کوي، چې اسلامي نظام وننګوي او دنیاوالو ته د اسلامي نظام غلط انځور وړاندې کړي، زمونږ موخه د دښمنانو پلانونه له منځه وړل دي او ټول د اسلام د دفاع په لومړیو لیکو کي شتون لرو، دا نظام د ډېرو سختيو او قربانیو په نتيجه کي رامنځته شوی، په کار ده چې د قلم په ژبه خپلې مبارزې ته د دوام ترڅنګ د دین او اسلام دښمنانو ته په نرمه لهجه ځواب ورکړو، عالیقدر امیرالمؤمنین شیخ صاحب حفظه الله اسلامپاله مبارزینو ته زیاته توجه کوي او دا کسان د اسلامي نظام ژبه بولي، نو موږ ټولو ته په کار ده، ترڅو ټول په یوه غږ او پوره هماهنګۍ د اسلامي امارت مثبتو لاسته راړونو ته انعکاس ورکړو.
د ناستې نورو ګډونوالو یو شمېر هغه اصول چي باید د اسلام، هیواد او اسلامي نظام په وړاندې د منفي تبلیغاتو مخه پرې نيول کيږي، د مجلس له ګډونوالو سره شریک کړل او له دوی څخه یې غوښتنه وکړه، چي پر همدغو اصولو او مقرراتو خپله مبارزه چټکه وساتي.
قلموالو مبارزينو په خپلو خبرو کې وويل: زموږ دنده د اسلام، نظام او هیواد د ګټو ساتنه او د نظام په وړاندې د خلکو د پروپاګند مخنیوی او ځوابي مبارزه کول دي، چي دغه مبارزه په کلک هوډ او پیاوړې ارادې سره مخته وړو.
۱۴۴۶/۲/۲۱ هـ ق
۱۴۰۳/۶/۴ هـ ل
