د ګیزاب اړوند خلج سیمه کې له يوې تاريخي کلا لیدنه وشوه
د روزګان ولایت د اطلاعاتو او کلتور رئیس مولوي رحمت الله ریحان ګیزاب ولسوالۍ ته د خپل رسمي سفر په ترڅ کې د دغې ولسوالۍ اړوند د خلج سیمې له کافر کلا تاریخي آبدې څخه لیدنه وکړه.
یاده کلا چې د ګیزاب ولسوالۍ د خلج سیمي په یوه لوړه سطحه کې موقعیت لري، د تاریخي ارزښت له پلوه ځانګړې سیمه ګڼل کېږي، دغه کلا اوس مهال یوازې د دیوالونو احاطه، دوه برجونه او د لویو ډبرو په منځ کي کیندل شوي اخورونه پاتې دي.
مولوي رحمت الله ریحان وویل: هڅه کوو، چې د ولایت ټولې تاریخي سیمې له نږدې وګورو او د ساتنې لپاره یې اړین ګامونه واخلو، دا ډول سیمې زموږ د فرهنګي هویت څرګندونه کوي.
د سیمې د خلکو په وینا؛ دا کلا له پخوا زمانو راهیسې په همدې نوم مشهوره ده، دوی وايي: دغه ځای د تاریخي ارزښت سربېره، د سیمې د پخوانیو تمدني نښو څرګندونه کوي او اوس يې هم خلک د لیدو لپاره ورځي، اخورونه، برجونه او دیوالونه د پخواني ژوند نښې دي، چي باید وساتل شي او په وینا یې چې په ډبرو کې کیندل شوي اخورونه پخوا د آسونو د خوراک لپاره کارېدل.
۱۴۴۶/۱۰/۲۶ ق
