د زرنج ښار له عامه کتابتون او موزیم څخه څارنه وشوه
د نيمروز ولايت د اطلاعاتو او کلتور رئيس مفتي حبيب‌الله الهام او يو شمېر نورو امارتي مسؤلينو د زرنج ښار له عامه کتابتون او موزیم څخه څارنه وکړه.
له يادې څارنې څخه موخه د موزيم له تاريخي آثارو څخه لیدنه او بررسي او د عامه کتابتون ستونزو ته رسیدګي کول او ځوانان مطالعې ته تشويقول وو.
د اطلاعاتو او کلتور رئيس وویل: عامه کتابتون د ځوان نسل لپاره غوره سرمايه ده، په کتابتون کې دا مهال شاوخوا دیارلس زره ټوکه د بېلابېلو علومو کتابونه شتون لري، چې په ټولو رسمي ورځو کې د مطالعې د مينوالو پرمخ پرانستی وي، مینوال کولای شي، دلته په ارامه چاپيريال کې له یادو کتابونو څخه ګټه واخلي.
ښاغلي الهام د نيمروز د موزيم په اړه وويل: د دې ولایت موزیم کې د ډبرو د دورې، د برونزو دورې، د کوشانیانو دورې، له کوشانیانو څخه د مخکنیو دورو، اسلامي او معاصري دورې اړوند نزدي ۱۲۰۰ تاريخي او لرغوني آثار شته دي، چې د نیمروز ولایت د بډایه او لرغوني کلتور ښکارندويي کوي.
۱۴۴۶/۸/۱۸ ق
۱۴۰۳/۱۱/۲۹ ل
