نیمروز کې خبریالانو لپاره د څېړنيز او سیار ژورنالېزم پنځه ورځنی علمي سمینار جوړ شو
د نیمروز ولايت د اطلاعاتو او کلتور رياست له لوري د خبريالانو د خونديتوب کمېټې په همکارۍ د یاد ولايت خبريالانو ته د څيړنيز او سیار ژورنالېزم په اړه پنځه ورځنی علمي سمينار جوړ شو.
د نیمروز د اطلاعاتو او کلتور رئيس مفتي حبیب الله الهام وویل: د دې ډول سمینارونو ترسره کول مرسته کوي، چې خبریالان د ژورنالیزم له اصولو او اساساتو سره ښه بلد شي او وړتیاوې یې لا پراخې شي، تر څو خپل کار په ډاډ او مؤثریت ترسره کړي.
په لوېديځ زون کې د خبریالانو د خوندیتوب د کمېټې مسؤول او د سمینار وړاندې کوونکي شمیل احمد مشعل د څېړنیز ژورنالیزم، د راپور د ډولونو، د څېړنیزو راپورونو د ډولونو، د خبریالۍ د مهارتونو، د څېړنیز راپور د برابرولو بهیر، سیار ژورنالیزم، د سیار ژورنالیزم ګټې، جعلي خبرونه، د سیار ژورنالیزم ننګونې او د خبر جوړولو د اخلاقي اصولو په اړه معلومات وړاندې کړل.
همداراز د نیمروز ولایت خبریالانو د اطلاعاتو او کلتور له ریاست او د خبریالانو د خوندیتوب له کمېټې څخه مننه وکړه او دغه سمینار یې په اوسني عصر کې د خبریالانو یوه مهمه اړتیا وبلله.
۱۴۴۶/۱۲/۱ هـ ق