د اطلاعاتو او کلتور وزارت د ګرځندوی، مالي او اداري چارو معین او ورسره مل پلاوي بغلان ولایت ته سفر وکړ

نن پنجشنبه د (۱۴۴۶ شعبان ۱۴ مه) د اطلاعاتو او کلتور وزارت د ګرځندوی، مالي او اداري چارو معين مولوي قدرت الله جمال، د کار کوونکو د چارو رئیس مولوي نقیب الله نعمان او ورسره مل پلاوي بغلان ولایت ته د سفر په ترڅ کې د بغلان ولایت د والي مولوي عبدالرحمان حقاني، مرستيال والي محمد همايون جهاديار او ددې ولايت د اطلاعاتو او کلتور له رئيس مولوي اسدالله مصطفی هاشمي سره وکتل.
په پيل کې د بغلان والي ښاغلي حقاني په ياد ولايت کې د اطلاعاتو او کلتور رياست چارې وستايلې او زياته يې کړه چې د ځوانانو د فکري روزنې لپاره بايد کار وشي، رسنۍ او مطبوعات د ملت د عليا ګټو په خاطر استعمال کړو او هڅه دې وشي چې بغلان ولايت کې د سیلانیانو لپاره اسانتياوې رامنځته شي.
همدارنګه ښاغلي حقاني وویل، چې ولايت مقام په ټولو اړوندو برخو کې د اطلاعاتو او کلتور ریاست سره همکار دی او ډاډ درکوو چې ټولو اړتياوو ته به یې پاملرنه کیږي.
ورپسې د ګرځندوی، مالي او اداري معين مولوي قدرت الله جمال د بغلان ولایت له والي سره د خپل سفر موخې شریکې او د دوی د همکارۍ څخه یې مننه وکړه؛ همدارنګه ښاغلي جمال وویل، چې د اطلاعاتو او کلتور وزارت، د بغلان ولایت د تاريخي ابداتو ساتنې، د رسنيو د فعالیتونو غښتلي کولو او د ځوانانو د انسجام  لپاره  هڅه کوي او په اړوندو برخو کې د همغږۍ او همکارۍ ډاډ درکوي.

2025/2/13 ز
۱۴۰۳/۱۱/۲۵ هـ ل