پنجشېر کې د (غرب سره فکري جګړې) سيالۍ پايلې اعلان شوې
په پنجشېر ولایت کې د اطلاعاتو او کلتور ریاست د ځوانانو چارو آمريت له خوا د (غرب سره فکري جګړې) سيالۍ پایلې اعلان شوې، دغه سيالي د اووه سوه ځوانانو ترمنځ جوړه شوې وه.
د پايلو په اعلان غونډه کې د پنجشېر د اطلاعاتو او کلتور رئیس مولوي نصرالله ملکزاده وویل: فکري جګړه تر نظامي جګړې ډېر خطرناکه ده، ځکه چې لوېدیځ له دې لارې زموږ د ځوانانو فکرونه خرابوي، الحادي نظریات اود بې دینۍ فرهنګ خپروي، ترڅو زموږ ځوانان د اسلامي ارزښتونو او مفاهیمو څخه لرې وساتي، هغه له ځوانانو وغوښتل، چې د دې ډول پوچو افکارو په وړاندې په جدي توګه مبارزه وکړي.
وروسته د پنجشېر د لوړو زده کړو مؤسسې رئیس مولوي مصطفی ابوسعید وویل: فکري جګړه د باورونو ماتول، ارزښتونو بدلول او د اسلام څخه د لرې کولو هڅه ده، موږ باید په هیڅ صورت د لوېدیځو هېوادونو د داسې برنامو په وړاندې بې پروا پاتې نه شو.
د يادونې وړ ده، چې د يادې سيالۍ لومړي مقام ګټونکي ته یو لپټاپ کمپيوټر، دوهم مقام ګټونکي ته یو سیټ موبایل، دریم مقام ګټونکي ته الفجر ساعت او لسو نورو غوره ګډونوالو ته لباسونه ډالۍ شول.
۱۴۴۶/۵/۱۲ هـ ق
۱۴۰۳/۸/۲۴ هـ ل
