خوست کې د آزادۍ پنځمې کليزې په ویاړ شانداره مشاعره ترسره شوه
د خوست ولایت په پښتونستان پارک کې د افغانستان د عمومي راډیو ریاست له لوري د زمري ۲۴مې (د آزادۍ پنځمې کليزې) په ویاړ شانداره مشاعره ترسره شوه، چې زرګونو هېوادوالو، شاعرانو، لیکوالانو، فرهنګیانو او ترانه ویوونکو پکې ګډون کړی و.
د مشاعرې په پیل کې د خوست ولایت د اطلاعاتو او فرهنګ رئیس مولوي محمد صابر صابري ګډونوالو ته د ښه راغلاست ترڅنګ وویل: د افغانستان آزادي د زرګونو قربانیو، سرښندنو او نه ستړې کېدونکو مبارزو په پایله کې ترلاسه شوې ده. نوموړي آزادي د ټولو افغانانو ګډ ویاړ وباله او ټینګار یې وکړ، چې د دې ستر نعمت ساتنه د هر افغان ګډ مسؤلیت دی.
د مشاعرې په لړ کې د افغانستان د عمومي راډیو رئیس قاري یوسف احمدي آزادي د الله تعالی ستر نعمت وباله او ویې ویل: افغان ولس د تېرې یوې پېړۍ په اوږدو کې د بېسارو قربانیو په پایله کې د نړۍ درې سترې امپراتورۍ ماتې کړې دي، چې دا د هېواد د تاریخ یو ویاړلی باب ګڼل کېږي.
دغه راز په مشاعرې کې شاعرانو، ترانه ویوونکو او ترنم کوونکو د هېواد د آزادۍ پنځمې کليزې په مناسبت خپل ملي، حماسي او ولسي شعرونه، غزلونه او ترانې هم وړاندې کړل، چې د ګډونوالو له لوري یې تود هرکلی وشو.
۱۴۴۸/۲/۲۲ هـ ق
