د ځوانانو د سوداګریزو وړتیاوو د پراختیا مرکز کې بله روزنیزه دوره پیل شو
د جوزجان ولایت د ځوانانو د سوداګریزو وړتیاوو د پراختیا مرکز کې نوې روزنیز دوره د سیمهییزو مسوولینو، ځوانانو او د اکټېډ مؤسسې د مسوولینو په حضور کې په رسمي ډول پیل شو.
د جوزجان د اطلاعاتو او فرهنګ رئیس مولوي سیفالدین معتصم د تخنیکي او مسلکي زدهکړو پر اهمیت ټینګار وکړ او له ځوانانو څخه یې وغوښتل چې له دې فرصت څخه غوره ګټه واخلي، د وخت له اړتیاوو سره سم مهارتونه زده کړي او د کارموندنې او ځانبسیاینې لپاره زمینه برابره کړي.
ورته مهال د جوزجان والي مولوي عبدالله سرحدي د ځوانانو د علمي ظرفیت او وړتیاوو لوړونې په برخه کې پانګونه د ټولنې له اساسي اړتیاوو څخه وبلله او ویې ویل: د ځوان نسل ظرفیت لوړونه د هېواد د پرمختګ، ودې او روښانه راتلونکي لپاره مهم بنسټ جوړوي. نوموړي د دغو روزنیزو پروګرامونو د پلي کولو په برخه کې د اکټېډ مؤسسې او د اطلاعاتو او فرهنګ ریاست له همکاریو څخه مننه وکړه.
په جوزجان کې د اکټېډ مؤسسې ولایتي مسوول وویل: دا پروګرام د شپږو میاشتو لپاره جوړ شوی او د جوزجان د اطلاعاتو او فرهنګ ریاست په همغږۍ او همکارۍ ترسره کېږي، چې په ترڅ کې به یې ۸۰۰ ځوانانو ته د انګلیسي ژبې، کمپیوټر، آنلاین سوداګرۍ (امازون) او مصنوعي ځیرکتیا (AI) په برخو کې روزنه ورکړل شي.
د اکټېډ مؤسسې ولایتي مسوول زیاته کړه، چې د تخصصي زدهکړو ترڅنګ به د دې مرکز ګډونوالو لپاره د رسنیزو، ورزشي سیالۍ او د سیرت النبي (ﷺ) ازموینې په ګډون به بېلابېل پروګرامونه هم جوړ شي. د نوموړي په وینا، د دې مرکز په تېرو څلورو پړاوونو کې ۲ زره او ۷۵۴ ځوانانو له روزنیزو او ظرفیت لوړونې پروګرامونو څخه مستفد شوي دي.
یو شمېر هغو ځوانانو چې په دې مرکز کې نوي جذب شوي، د دغه روزنیزې دورې له پیل څخه د هرکلي کولو ترڅنګ د ورته پروګرامونو پر دوام ټینګار کوي .
۱۴۴۸/۲/۸ هـ ق
