د اطلاعاتو او فرهنګ وزارت د فرهنګ او هنر معين بلخ ته سفر وکړ

د اطلاعاتو او فرهنګ وزارت د فرهنګ او هنر معين پوهاند محمد رسول باوري د لرغوني بلخ د تاريخي څلو د حالت د څېړنې په موخه بلخ ته سفر وکړ.
محمد رسول باوري د دغه سفر په بهير کې له يوشمېر فرهنګيانو، شاعرانو، د پوهنتون له محصلانو او له سيمه ييزو مسوولينو سره د جهان نما بڼ د حالت د څېړنې په خاطر د خلم ولسوالۍ ته لاړ.
د خلم ولسوال تاج محمد رحيمي وويل چې په دې ولسوالۍ کې د شهر بانو، سرپټی بازار او د جهان نما بڼ په ګډون زيات شمېر څلي شته چې زياتره يې د ويجاړېدو په حال کې دي.
د اطلاعاتو او فرهنګ وزارت د فرهنګ او هنر معين پوهاند محمد رسول باوري وويل چې د بلخ ولسوالۍ ته د بلخ پوهنتون له يوشمېر محصلانو او فرهنګيانو سره د ده د راتګ موخه، د تاريخي څلو د حالت څېړنه او د ګرځندوى فرهنګ رواجول دي.
هغه د تاريخي څلو څېړنه او د امنيت تامينېدل د سيلانيانو او د هېواد د عوايدو د زياتوالي سبب وباله.
پوهاند باوري بلخ د ګرځندوى له جاذبو څخه وباله.
پوهاند باوري وويل چې تراوسه پورې بريالي شوي دي چې لسګونه لوټ کړاى شوي آثار بېرته ملي موزيم ته راوړي.
د بلخ د اطلاعاتو او فرهنګ رييس مطيع الرحمن کريمي وويل چې په بلخ کې د مولانا ستره غونډه او علمي او سياحتي کار په بلخ کې د فرهنګي اوونۍ د درناوي له پروګرامونو څخه دي چې د اطلاعاتو او فرهنګ وزارت پيل کړي دي.
د بلخ د اطلاعاتو او فرهنګ رييس وويل: څه دپاسه ۱۰۰ ابدې مو ثبت کړې او د بلخ په ځينو ولسواليو کې مو يوشمېر تاريخي آبدې ترميم او بيارغولې دي؛ خو هغه څلي چې د وسله والو طالبانو تر واکمنۍ لاندې سيموکې دي؛ نه شو کولاى هغوى ترميم کړو.
د جهان نما بڼ د مزار شريف ښار په ختيځ ٥٥ کيلومتري واټن کې د مزار شريف – بلخ  لويې لارې ته څېرمه موقعيت لري چې ۱۰۰ کاله مخکې د امير عبدالرحمن خان د واکمنۍ په وخت کې جوړ شوى دى.
کابل / د تلې١٥مه / باختر