محمد طاهر زهیر: خلک حق لري چې د دولتي ادارو له منته پرته اطلاعات وغواړي

اطلاعاتو ته د لاسرسي نړیواله ورځ د اطلاعاتو او فرهنګ وزارت د سرپرست او نوماند وزیر په شتون او د روڼتیا څار په اهتمام نن ونمانخل شوه.

په هغه پروګرام کې چې په همدې موخه جوړ شوی و، په پیل کې د روڼتیا څار اجرایي  رییس سید اکرم افضلي په ۱۹ دولتي ادارو کې اطلاعاتو ته د لاسرسي په اړه د خپلې ادارې د څېړنیزو موندنو رپوټ وړاندې کړ. د دغه رپوټ د موندنو له مخې، د کرنې او اوبولګولو او مالدارۍ وزارت، د اداري اصلاحاتو او ملکي خدمتونو خپلواک کمېسیون او ملي تدارکاتو اداره په وار سره لومړی، دویم او درېم ځای  لري.

د غونډې  په دوام د اطلاعاتو او فرهنګ وزارت سرپرست او نوماند محمد طاهر زهیر اطلاعاتو ته د لاسرسي نړیوالې ورځې مبارکی وویله او زیاته یې کړه چې د ښاروندانو حقوق په اساسي قانون او نورو نافذو قوانینو کې ټاکل شوي دي او خلک حق لري چې د ادارو له منته پرته د اطلاعاتو غوښتنه وکړي او ادارې د قانون له مخې مکلفې دي چې ښاروندانو ته اطلاعات ورکړي.

همدارنګه اطلاعاتو ته د لاسرسي کمېسیون رییس عین الدین بهادري، د کرنې، اوبولګولو او مالدارۍ وزارت سرپرست او نوماند انوارالحق احدي، د ملکي خدمتونو او اداري اصلاحاتو کمېسیون کمیشنر سید حشمت الله هاشمي او د ملي  تدارکاتو ادارې لوی رییس الهام عمرهوتکي خبرې وکړې. ویناوالو د لاسته راوړنو او په خپلو اړوندو ادارو کې اطلاعاتو ته د لاسرسي د څرنګوالي په اړه وغږېدل.

کابل/ د تلې ۷مه/ باختر