فرهنګي معینیت

د هارون حکیمي لنډ ژوندلیک

 

هارون حکیمي د ۱۳۶۹لمریز کال د سلواغې (دلوي) میاشتې پر ۱۲مه، په زابل ولایت کي وزېږېد. لومړنی ښوونځی یې په خپل کور کې ولوست او په ۱۳۸۱د کلات په شېخ متي منځني ښوونځي کي شامل شو. د لېسې دوره یې په کابل کي د رحمان بابا او خوشحال خان په ښوونځیو کې بشپړه کړه. په سیاسي علومو کې د لسانس سند یې د هندوستان د کلتوري اړیکو شورا ICCR د سکالرشیپ له لارې د هندوستان د پنجاب پوهنتون څخه ترلاسه کړ او په سیاسي افکار کې تخُصص یې د هندوستان د چندیګړ ښار په  ( Dayanand Anglo-Vedic

DAV( پوهنتون کې وکړ.

په ۲۰۱۷ میلادي کال یې، د فولبرایټ د سکالرشیپ په اخیستلو د امریکا متحده ایالتونو په پلازمېنه کې، امریکایي پوهنتون ( American University) ته د ماسټري لپاره لاره پیدا کړه او د نړیوال خدمت په څانګه کې یې پر نړیوال سیاست، نړیوال امنیت او نړیواله حکومتولي متمرکزې زده کړې وکړې.

په ۲۰۱۹ کال یې د دوهمې ماسټرۍ لپاره په واشنګټن ډي سي کې نړیوال سیاست پوهنتون The Institute of World Politics ته لاره وکړه او په ۲۰۲۰ کال یې د ملي امنیت په چارو کې له نوموړي پوهنتون څخه د ماسټري بریلیک ترلاسه کړ.

د لوړو زده کړو په بهیر کې، د هارون حکیمي څېړنې تر ډېره د افغانستان اوسیمې پر قضیو متمرکزې دي.

حکیمي د خپلې لومړۍ ماسټرۍ پایلیک د کولمبیا دسولې له پروسې څخه د افغانستان لپاره پر ممکنو درسونو لیکلی دی.

هارون حکیمي یو جرار او فصیح ویاند، غوره لیکوال او نقاد او په ټولنیزو او سیاسي چارو کې فعاله او پېژندلې څېره ده.

هغه د خپلو زده کړو د ملاتړ په موخه له زده کړو سره هممهاله د ښوونځي له دورې راهیسي کار کوي.

هغه په لومړي سر کې د رسنیو سره د ادبي او کلتوري پروګرامونو په ویندویي او ژورنالیزم کې بوخت شو چې په دې لړ کې یې د بي بي سي BBC او ملي تلویزیون RTA په ګډون د ګڼو ملي او نړیوالو رسنیو سره مشهورو خپرونو د ویاند په توګه کار وکړ.

په ۲۰۱۰ کال یې د سرحدونو قومونو او قبایلو وزارت د رسنیو او کلتوري چارو د سلاکار په توګه د حکومت سره همکاري پیل کړه او په ۲۰۱۱ کال یې په بهرنیو چارو وزارت کې دنده پیل کړه. د ۲۰۱۵ او ۲۰۱۶ کلونو په اوږدو کې یې د ۱۶ میاشتو لپاره د اطلاعاتو او فرهنګ وزارت د سلاکار او ویاند په توګه دنده ترسره کړه او په یاده موده کې یې د رسنیزو کمیسیونونو په جوړولو او دولتي روایتونو د دفاع بریالۍ هڅې وکړې. د ۲۰۱۶ څخه تر ۲۰۱۷ کال پوري د بهرنیو چارو وزارت د ملګروملتونو او نړیوالو کنفرانسونو ریاست مرستیال و او په ۲۰۱۷ کال په واشنګټن ډي سي کي د افغانستان په لوی سفارت کي د ‌‌‌‌‌‌ډيپلوماټ په توګه وټاکل شو. د لاتینې امریکا، سفارتي اړیکو او سفارت د کلتوري چارو ترڅنګ، د امریکا مېشتو افغانانو سره د همغږۍ د مسٔیولیتونو په پرمخ وړلو، د ۲۰۲۰ د آګسټ په میاشت کې د څه باندي درې کلن ماموریت بشپړولو وروسته بیرته هېواد ته راستون شو چې د اطلاعاتو او فرهنګ وزارت د وړاندیز او  ولسمشر ۵۲۲ شمېرې حکم پر بنسټ د ۱۴۰۰ لمریز کال د ثور میاشتې پر ۱۸، په مافوق رتبه بست کې د اطلاعاتو او فرهنګ وزارت د فرهنګ او هنر د معین په توګه وټاکل شو.

Haroon Hakimi