غزني کې د کتاب نندارتون جوړ شو
غزني کې د اطلاعاتو او کلتور ریاست په نوښت په تخنیکي پوهنتون کې (د کتاب واخله کتاب کیږده) عنوان لاندې د کتابونو دوه ورځنی نندارتون د یاد ریاست د مسؤلینو لخوا پرانیستل شو.
د یاد نندارتون د پرانېستې پر مهال د اطلاعاتو او کلتور رئیس ملا حمیدالله نثار د دغه نندارتون د جوړولو موخه د کتاب لوستلو د کلتور عامول او مطالعې ته د ځوانانو هڅونه یاده کړه.
نوموړي زیاته کړه؛ د کتابونو په دغه دوه ورځني نندارتون کې د اطلاعاتو او کلتور ریاست اړوند د البیروني عامه کتابتون او تخنیکي پوهنتون په همکارۍ سلګونه ټوکه کتابونه د یاد پوهنتون په انګړ کې نندارې ته ايښودل شوي، چې دوه ورځې به دوام ولري.
د ښاغلي نثار په خبره اطلاعاتو او کلتور ریاست هڅه کوي، چې د ځوانانو لپاره د کتاب لوستلو کلتور د غوړیدا لپاره بشپړه زمینه برابره کړي.
د تخنیکي پوهنتون رئیس پوهنمل فدا محمد محمدي د مطالعې کلتور عامولو او مطالعې ته د زده کړیالانو د هڅونې په برخه کې د دا ډول نندارتونونو جوړول ګټور وبلل، نوموړي له ځوانانو وغوښتل، چې په یاد نندارتون کې د یوه کتاب په اخیستلو او یوه کتاب په کیښودلو سره ګډون وکړي.
د نوموړي په وینا هغه کتابونه، چې تاسو مخکې لوستلي دلته يې په بدل کې داسې کتاب ترلاسه کولای شئ، چې تر دې وړاندې مو نه وي مطالعه کړی.
د یادونې وړ ده چې په یاد نندارتون کې بېلابېل دیني، کلتوري، ادبي، ټولنيز او اقتصادي کتابونه نندارې ته وړاندې شوي دي.
۱۴۴۶/۵/۲ هـ ق
۱۴۰۳/۸/۱۴ هـ ل
