د کابل د زوړ ښار د ودانيو د تاريخي سبک او معمارۍ ارزونه کيږي
یکشنبه ( ۲۶ د شوال المکرم ۱۴۴۵) د کابل ښار د تاریخي آبداتو، عامه ساحو او چاپېریال ساتنې د څارنې او ساتنې کمېټې ناسته د اطلاعاتو او فرهنګ وزارت د هنر او فرهنګ معين مولوي عتيق الله عزيزي په مشرۍ په ياد معينيت کې ترسره شوه.
یاده ناسته کې د اطلاعاتو او فرهنګ وزارت د هنر او فرهنګ معین مولوي عتیق الله عزیزي، د کابل ښاروالۍ کلتوري رئیس، د اغاخان فرهنګي خدماتو موسسې، ښار جوړونې وزارت، د چاپیریال ساتنې ادارې او د تاریخي آبداتو د ساتنې ریاست استازو او مسؤلینو ګډون درلود.
ناسته کې د کابل ښار تېمور شاهي بڼ ته نژدې د لومړۍ حوزې تعمیر چې یو له تاریخي آبدو څخه ده، د ساتنې او استحکام په اړه، همدارنګه د کابل ښار لوړپوړېزو ودانيو په اړه چې د تاریخي آبدو ننداره د خطر سره مخ کوي، هر اړخیز بحث وشو.
د هنر او فرهنګ معین مولوي عتیق الله عزیزي د یادې کمېټې غړو ته سپارښتنه وکړه، چې د کابل ښار په جوړه شوی عمومي فرهنګي نقشه د امکان په صورت له سره غور وکړي او د قوانینو په رڼا کې یاده کمیټه اولیتونه او ترجیحات په ګوته او راتلونکو ناستو ته یې وړاندې کړي، ترڅو د اړوندو ادارو سره په همغږۍ یې د منظورۍ لپاره رهبرۍ ته واستوي.
ښاغلي عزیزي وویل: د کابل زاړه ښار د معماریو او لرغونو سیمو ساتنه د هیواد د تاریخ، هویت او د اسلافو د ځلانده هنر او کمالاتو امانت دی، چې په ګډه یې باید وساتو.
۱۴۰۳/۲/۱۶ هـ ل
۲۰۲۴/۵/۵ میلادي
