د ځوانانو چارو معينيت يو شمېر ښځينه ورزشکارانې وستايلې

د اطلاعاتو او فرهنګ وزارت د ځوانانو چارو معينيت سرپرست لايق شاه ځدران نن
يو شمېر ښځيه ورزشکارانې وستايلې.
د باختر آژانس د خبر له مخې؛ په هغې غونډه کې چې په همدې مناسبت جوړه شوې وه؛ د ځوانانو چارو معينيت سرپرست وويل چې نشه يي توکي د ځوانانو يوازېنى خطرناک دښمن دى او يوازېنۍ لاره چې دغه خطرناکه دښمن ناکاموي، ورزش دى.
ځدران له ښځينه ورزشکارانو څخه د ځوانانو چارو معينيت ملاتړ اعلام وکړ او زياته يې کړه چې په هر راز شرايطو کي بايد د ورزشکارانو په تېره بيا ورزشکارو نجونو ملاتړ وشي.
وروسته د دايکنډي د اطلاعاتو او فرهنګ رييس وويل چې په دايګنډي کې د نجونو لپاره ورزش اسانه کار نه دى او دغه نجونې له زياتو ستونزو سره مخ دي چې نن د يو دولتي مقام له لوري ستايل کېږي.
په دغو مراسمو کې د ځوانانو چارو معينيت د مصؤنيت رييس فدامحمد فايض وويل   دغه پروګرام د د ايکنډي د اطلاعاتو او فرهنګ رياست په همکارۍ جوړ شوى دى او په کې د دايکنډي ١٦ ورزشکارې نجونې، ٢ ښوونکي، د کابل د معلولو نجونو د ټيم په استازيتوب ٣ تنه، د نجونو د هنډبال او جمناسټېک له څانګو څخه  ٢ نجونې او دغه راز ITF  او موی تاى څانکو يوشمېر نجونې وستايلې شوې.
دغو ورزشکارو نجونو په کورنيو او بهرنيو سياليو کې ښه برياليتوبونه ترلاسه کړي دي او دغه راز په هغو سياليو کې چې ( موږ سوله غواړو) تر شعار لاندې د٤  ټيمونو  ترمنځ په باميانو کې ترسره شوې؛ لومړى مقام وګاټه.
کابل / د تلې ۷ مه / باختر