د هرات ولايت اقتصادي مرستيال مولوي مهاجر فراهي د ژورنالستانو او رسنيو سره تعارفي ناسته وکړه
دوشنبه(۲ د شعبان ۱۴۴۵) د اطلاعاتو او کلتور وزارت نشراتي معين او د هرات ولايت اقتصادي مرستيال مولوي مهاجر فراهي د ژورنالستانو او رسنيو سره تعارفي ناسته وکړه.
ناسته کې د اطلاعاتو او کلتور وزارت نشراتي معين او د هرات ولايت مقام اقتصادي مرستيال مولوي مهاجر فراهي، د هرات د اطلاعاتو او کلتور رئیس مولوي احمدالله متقي، د نورو دولتي ادارو مسؤلينو، خبريالانو او د رسنيو مسؤلينو ګډون کړی و.
ښاغلي فراهي د اطلاع رسونې په برخه کې د رسنيو او ژورناليستانو رول مهم وباله او له دوی يې وغوښتل چې په رښتينولۍ سره خبري واقعات خپاره کړي.
نوموړي زياته کړه؛ اسلامي امارت د بيان د ازادۍ او اطلاع رسونې برخه کې له رسنیو ملاتړ کوي، دا مهال هېواد کې بنسټيزې پروژې روانې دي، تر څنګ يې د اوبو بندونه جوړول، د کانونو ويستل، د داخلي تولیداتو زياتېدل او داسې نور واقعيتونه بايد له رسنيو څخه خپاره کړل شي.
د ژورنالستانو او رسنيو په استازولۍ دوو تنو ژورنالستانو محسن کريمي او احمد احمدي په خپلو خبرو کې د اسلامي امارت او کړنو څخه يې ملاتړ څرګند کړ او زياته يې کړه؛ د بهرنيو رسنيو د دروغجنو خبرونو پر وړاندې مبارزه کوي او واقعيتونه خپروي.
