د لوحو او تبلیغاتي اعلاناتو د اصلاح کمېسيون د کابل ښار له دویمې، څلورمې او لسمې ناحيې څخه څارنه وکړه

د لوحو او تبلیغاتي اعلاناتو د اصلاح کمېسیون د کابل ښار د دویمې، څلورمې او لسمې ناحیې اړوند لوحو څخه د پتې موندلو په موخه څارنه وکړه.
د دې څارنې او اصلاحي بهیر په پیل کې د یادو سیمو د اهمیت، او د لوحو او تبلیغاتي اعلاناتو د اصلاح او څارنې د څرنګوالي په اړه له رسنیو او اصنافو سره خبرې وشوې.
همدارنګه، د غیرمعیاري لوحو او تبلیغاتي اعلاناتو لپاره د کمیسیون د مسلکي غړو له لوري د هېواد په ملي ژبو بدیلونه وړاندې شول او د ځینو لپاره اصلاحی وړاندیزونه هم وشول.
همداراز، د کابل ښاروالۍ له خوا لګول شوې ډېری لوحې د کمیسیون د طرزالعمل له معیارونو سره سمې عیار شوې دي او هغه لوحې چې نیمګړتیاوې لري، د کمیسیون په راتلونکي ناسته کې به پرې پرېکړه وشي.
د یادونه وړ ده، چې په دې ساحوي پروګرام کې د کابل ښاروالۍ له لوري له (۲۵) څخه زیاتو لګول شویو لوحو څخه څارنه وشوه.

۱۴۴۷/۷/۲۳ ه‍ ق