د "بهار هنرها" په نامه نندارتون په لوګر کې جوړ شو

د هنرونو پسرلی (بهار هنرها) په نامه نندارتون نن د لوګر د اطلاعاتو او فرهنګ د رياست او د خطاطانو، خوش نويسانو او انځورګرو اتحاديې په همکارۍ په دغه ولايت کې جوړ شو.
په دغه نندارتون کې د خطاطۍ، رسامۍ، انځورګرۍ او نورو هنرونو آثار نندارې ته وړاندې شوي دي.
د لوګر والي عبدالقيوم رحيمي د هنرمندانو ملاتړ د دغه ولايت د سيمه ييزې ادارې لومړيتوبونه وبلل او د خطاطۍ، انځورګرۍ او نورو هنرونو د ودې او پراختيا په لاره کې د دغه شان نندارتونونو جوړول مهم وبلل.
رحيمې زياته کړه: اوس په لوګر کې هنري حالت دومره ښه نه دى او هلې ځلې کوو چې د هنرمندانو په همکارۍ په دغه ولايت کې فرهنګي انقلاب رامنځته کړو او په لوګر کې د فرهنګي او هنري برخې دوه زره کلنې وياړنې راژوندي کړو.
د نندارتون يو کتوونکي سيداجمل سروش له سيمه ييزې ادارې د ليکوالو او هنرمندانو د ملاتړ غوښتنه وکړه.

کابل/ د وري ۱۷ مه/ باختر