نیمروز کې د رسنیو له مسؤلینو او خبریالانو سره د همغږۍ ناسته وشوه
د نیمروز ولایت د اطلاعاتو او کلتور د رئیس مفتي حبیب الله الهام په مشرۍ د رسنیو له مسؤلینو او خبریالانو سره د همغږۍ ناسته وشوه.
د اطلاعاتو او کلتور رئيس مفتي حبيبالله الهام ګډونوالو ته د ښه راغلاست تر څنګ د ناسمو دودونو، نشه یې توکو، انساني قاچاق اړوند د عالیقدر امیرالمؤمنین حفظهالله د فرامینو او همدا راز د ترافيکي اصولو په اړوند د خپرونو د چمتوکولو او عامه پوهاوي کولو په اړه خبرې وکړې او د رسنیو له مسؤلینو او خبریالانو څخه یې وغوښتل، چې د عالیقدر امیرالمؤمنین حفظه الله د فرامینو ښه پلي کولو په برخه کې د نشراتي پالیسۍ او د ټولني غوښتنو او اړتیاوو سره سم پرګرامونه چمتو کړې او د راپور خپرولو پر مهال دقت او حقایق په پام کې ونیسي.
دغه راز د افغان خبريالانو د خونديتوب د کمېټې مسؤول عبدالغفار عزيزي د اطلاعاتو او کلتور ریاست د همکارۍ څخه د مننې کولو ترڅنګ د اسلامي نظام د دندو او فعالیتونو په منعکس کولو کې د خبریالانو پر رول ټینګار وکړ او په نیمروز کې یې د ځایي مسؤولینو د ملاتړ، همغږۍ او اطلاعاتو ته د لاسرسي څخه خوښي څرګنده کړه.
د غونډې په ترڅ کې ګډونوالو د رسنیو سره د اطلاعاتو او کلتور ریاست له دوامداره همکاریو او ملاتړ څخه مننه وکړه او خپلې ستونزې او وړانديزونه يې شريک کړل او همدا راز یې په یادو برخو کې د خپرونو چمتو کولو ډاډ څرګند کړ.
۱۴۴۷/۵/۱۷ هـ ق