د ګرځندوی، مالي او اداري چارو معين افغانستان لپاره د (PTS) نړیوال ښوونيز سازمان له مسؤل سره وکتل

پنجشنبه ( ۲ د ربیع الاول ۱۴۴۶) د اطلاعاتو او کلتور وزارت د ګرځندوی، مالي او اداري چارو معين مولوي قدرت الله جمال په خپل کاري دفتر کې د افغانستان لپاره د (PTS) نړیوال ښوونيز سازمان له مسؤل کلاوز بار سره د وزارت مقام د کارکوونکو د مهارت او ظرفیت لوړونې په موخه وکتل.
د (PTS) نړیوال ښوونيز سازمان مسؤل ښاغلي بار د ګرځندوی، مالي او اداري چارو معين ته د ياد ښوونيز سازمان د فعاليتونو په اړه وویل: (PINNACLE TEACHING SOLUTION)  يو نړيوال تعليمي سازمان دی، چې د نړۍ په اوولس هيوادونو کې د دولتي ادارو او شرکتونو د کارکوونکو د مهارتونو او ظرفیت لوړولو برخه کې فعاليت کوي، غواړي چې د اطلاعاتو او کلتور وزارت کارکوونکو ته هم د ګرځندوی، هوټلدارۍ او سیلانيانو لپاره د مناسبو خدماتو وړاندې کولو برخه کې د دريو اونيو لپاره د انګليسي ژبې د مهارتونو لوړولو ښوونيز پروګرام ترسره کړي.
نوموړي زياته کړه؛ د (PTS) نړیوال ښوونيز سازمان غواړي چې د خپلو غوره خدماتو په وړاندې کولو سره افغانستان کې د ګرځندوی صنعت ته وده ورکړي، دا مهال افغانستان ته د سيلانيانو پام راوښتی دی، موږ غواړو چې دلته په ډله ئيز ډول سره سیلانيان راشي او د افغانستان له طبيعي ښکلاو خوند واخلي.
د ګرځندوی، مالي او اداري چارو معين مولوي قدرت الله جمال د (PTS) نړیوال ښوونيز سازمان له پروګرامونو هر کلی وکړ او ويې ويل: دا پروګرام به د اطلاعاتو او کلتور وزارت کارکوونکو ته ډیر ګټور تمام شي، اوس مهال افغانستان کې سیاحت ته ښه زمينه برابره ده، افغانان مينه ناک اومیلمه پاله خلک دي، چې له سيلانيانو سره نیک چلند کوي.

۱۴۰۳/۶/۱۵ هـ ل
۲۰۲۴/۹/۵ میلادي