د کتاب اونۍ په وياړ کابل پوهنتون کې د قرانکریم او کتاب نندارتون جوړ شو
یکشنبه (۱۰ د ذوالقعدې ۱۴۴۵) د اطلاعاتو او فرهنګ وزارت د نشراتو معینیت اړوند د بیهقي کتاب خپرولو رياست له لوري د کتاب اونۍ په وياړ د کتاب لوستنې دود د پراختیا په موخه په کابل پوهنتون کې د قرانکریم او کتاب دوه ورځنی نندارتون جوړ شو.
د نندارتون د پرانستې مراسمو کې د بیهقي کتاب خپرولو رياست رئيس مفتي عبدالعليم ځانواک، د کابل پوهنتون رئيس دوکتور اسامه عزيز، د ياد پوهنتون معاونينو، د خپرندويه ټولنو استازو، محصلينو او ځوانانو برخه اخيستې وه.
مراسم د قرانکریم د مبارکو آیتونو په تلاوت سره پیل شول، ورپسې د بیهقي کتاب خپرولو رياست د چاپ او خپرولو آمر حميدالله وياړ د ياد رياست د ۱۴۰۲ کال فعالیتونو په اړه معلومات وړاندې کړل او زياته يې کړه؛ دا دوه ورځنی نندارتون د کتاب اونۍ په وياړ په کابل پوهنتون کې جوړ شوی، چې دوه ورځې به دوام ولري، همدا ډول به د پل چرخي مرکزي زندان او دارالایتام کې هم د کتاب نندارتونونه جوړ شي، د ښاغلي وياړ په وينا؛ د بیهقي کتاب خپرولو رياست پام کې لري، چې د پوهنتون د استادانو او محصلینو کتابونه په وړيا ډول چاپ کړي.
د کابل پوهنتون رئيس دوکتور اسامه عزيز د علم، ادب او مطالعې پر ارزښت خبرې وکړې او له ځوانانو يې وغوښتل چې له شته فرصتونو ګټه واخلي، او ډيره مطالعه وکړي.
د يادونې وړ ده، چې په کابل پوهنتون کې د بیهقي کتاب خپرولو رياست د غرفې پرانسته هم وشوه.
۱۴۰/۲/۳۰ ھ ل
۲۰۲۴/۵/۱۹ ميلادي
