د مس عینک په کان کې شته لرغوني اثار به په خوندي توګه ساتل کیږي
چهارشنبه ( ۱۸ د محرم الحرام ۱۴۴۶) د اطلاعاتو او کلتور وزیر ملا خیرالله خیرخواه صاحب د لوګر په محمداغې ولسوالۍ کې د مسعینک کان د استخراج عملي چارو د پیل په مراسمو کې د یاد کان استخراج او د پروسیس چارو پیل د افغانستان د تاریخ ویاړمنه شېبه ګڼلې.
ښاغلي خیرخواه صاحب ډاډ ورکړی، چې دلته شته لرغوني اثار به په خوندي توګه ساتل کیږي.
د يادې پروژې د پرانستې په مراسمو کې د اطلاعاتو او کلتور وزير زیاته کړه: د تاريخي آثارو د ساتنې په موخه د ټولو اړخونو له هلو ځلو څخه مننه کوو، د مس عینک د کان کیندنه د اړخ طرف څخه د ځمکې د تل طرف ته پيليږي، تر څو تاريخي آثار محفوظ پاتې شي، د تاريخي آثارو ساتنه او د کان کیندنه په هم مهاله توګه یو پېچلی کار وو، چې د ښکیلو اړخونو په همغږۍ سره په ښه توګه د یوې قوي طرحې په پلي کولو سره مدیریت، حل او پیل شو، دا پروژه په روان وخت کې د نورو پروژو په پيل کې هم آسانتيا راوستلی شي.
نوموړي همدا راز له ښکیلو اړخونو څخه غوښتنه وکړه، چې د آثارو د ساتنې په موخه د طرحي مطابق مؤثر ګامونه واخلي.
۱۴۰۳/۵/۳ هـ ل
۲۰۲۴/۷/۲۴ میلادي
