د (شرعي نظام په استحکام کې د اطاعت اغېزې) کتاب لوستنې سیالۍ پایلې اعلان شوې
لغمان د اطلاعاتو او کلتور ریاست له لوري د الصارم فکري او فرهنګي ادارې او د پوهنې امریت په ګډو همکاریو چې څه موده وړاندې په فرشغان ولسوالۍ کې د ۵۰۰ تنو ځوانانو ترمنځ د (شرعي نظام په استحکام کې د اطاعت اغېزې) کتاب لوستنې سیالي ترسره شوې وه، پایلې اعلان او مخکښ ګډونوال یې وستایل شول.
د اطلاعاتو او کلتور ریاست مسؤلینو له یادې سیالۍ څخه موخې د ځوانانو فکري اصلاح، ځوانان د اطاعت له ګټو او اغېزو خبرول او د مطالعې کلتور عامول وبلل او زیاته یې کړه، چې د ځوانانو د لاډېرې هڅونې په موخه لومړي مقام ګټونکي ته کمپیوټر، دوهم مقام ګټونکي ته لاسي ساعت، درېیم مقام ګټونکو ته نغدې پیسې او نورو مخکښو ګډونوالو ته بېلابېلې ډالۍ وویشل شوې.
دغه راز د سیالیو ګډونوالو دا ډول سیالۍ د ځوانانو د هڅونې، مطالعې سره د اشنایۍ او فکري اصلاح په برخه کې ګټورې وبللې.
۱۴۴۷/۸/۲۹ هـ ق
