د رسنيزو سرغړونو او شکايتونو د ارزونې کمېسيون غونډه وکړه
د اطلاعاتو او فرهنګ وزارت د سرپرست ملا خيرالله خيرخواه په مشرۍ د رسنيزو سرغړونو او شکايتونو د ارزونې کمېسيون غونډه وکړه.
په دې غونډه کې د يو شمېر رسنيزو شکايتونو پر څېړنې سربېره د رسنيو لپاره د لا زياتو اسانتیاوو برابرولو، ستونزو پر حل، مالیې پر معافیت، اسانتیاوو برابرولو او هغو رسنیو په اړه چې د اسلامي ارزښتونو او د هېواد ملي ګټو پر خلاف منفي پروپاګند کوي، خبرې وشوې. په یاده غونډه کې رسنۍ د نظام يو مهمه اړتیا بلل شوې او ډاډ ورکړل شوی چې د قانون په چوکاټ کې به رسنیو ته لا زياتې اسانتیاوې برابرېږي.
د رسنيزو سرغړونو او شکايتونو د ارزونې کمېسيون غونډه کې پرېکړه شوې چې هغه رسنۍ چې د واقعيتونو او قانون پر خلاف خپرونې کوي، یو فرصت ورکړل شي چې د نافذه قوانينو په چوکاټ کې خپل فعاليتونه تنظيم کړي.