د چین سفیر: د افغانستان د تاریخي آبداتو او آثارو په ساتنه کې پراخو مرستو ته چمتو یو
د اطلاعاتو کلتور وزارت د هنر او کلتور معین مولوي عتیق الله عزیزي په خپل کاري دفتر کې د چین ولسي جمهوریت له سفیر ښاغلي ژاو شینګ سره د دواړو هېوادنو تر منځ د کلتوري اړیکو او د تاریخي آبداتو د استحکام په تړاو ناسته وکړه.
د هنر او کلتور معین مولوي عتیق الله عزیزي د چین هېواد له همکاریو مننه وکړه او زیاته یې کړه؛ چې افغانستان او چین ګڼ تاریخي او کلتوري مشترکات لري، چې د هغو تاریخي اقدارو ساتنه او خوندیتوب د دواړو هیوادونو مکلفیتونه جوړوي.
د هنر او کلتور معین وویل: د مس عینک په سیمه کې هم اقتصادي زیرمې لرو او هم تاریخي شتمنۍ، چې له نېکه مرغه د دواړو هېوادونو د چارواکو په مرسته نوموړې پروژه په مناسب ډول مدیریت شوه او دواړو برخو ته د حل لار برابره شوه.
ښاغلي عزیزي زیاته کړه؛ د اسلامي امارت په راتګ سره د تاریخي آثارو د قاچاق ، ناقانونه کېندنو او غصب څخه په جدي ډول مخنیوی شوی او وخت رارسیدلی، چې نړیوال کلتوري سازمانونه او هېوادونه د افغانستان د کلتوري ارزښتونو په ساتنه کې همکاري وکړي.
په ياده لیدنه کې د چین ولسي جمهوریت سفیر ښاغلي ژاو شینګ وویل: هېواد یې د ګډو کلتوري مشترکاتو د درلودو له امله د افغانستان د تاریخي آبدو او کلتوري آثارو د ساتنې او استحکام په برخه کې علاقه مندي لري او هر ډول همکاریو ته چمتو دی.
ښاغلي ژاو شینګ زياته کړه؛ د چینایي کمپنۍ (MCC) او کانونو او پترولیم وزارت د پلان له مخې به د راتلونکي کال په لومړیو میاشتو کې د مسو د استخراج پروسه عملاً پیل شي او هلته د شته تاریخي آثارو ساتنه د دواړو هېوادونو ګډ مکلفیت دی.
ښاغلي ژاو شینګ وویل: حتی ولسمشر شي جین پېنګ ورته هدایت کړی، چې د مس عینک د سیمې تاریخي آثارو د ساتنې په برخه کې خاصه پاملرنه وکړي.
۱۴۴۶/۴/۲۵ هـ ق
۱۴۰۳/۸/۷ هـ ل
