د ملي موزيم پلاوي غزني ولايت ته سفر وکړ
تېره ورځ د غزني ولايت د اطلاعاتو او کلتور ریاست ته د افغانستان له ملي موزیم څخه یو څلور کسیزه پلاوي د دغه ولایت د اطلاعاتو او کلتور ریاست د ملي موزیم د تاریخي آثارو د ثبت، سجل، بیارغونې او وقایې په موخه سفر وکړ.
په یاد څلور کسیزه پلاوي کې ښاغلي نجیب الله عطایي د نورستان دورې د آثارو کوریتور، اسلام الدین غفاري د لرغونو آثار د جورونې غړی، کریم الله آرین د انتوګرافي آثارو د ترمیم او جوړونې مدیر او محمد رضا رحیمي د ملي موزیم عکاس شامل دي.
پلاوي د غزني د اطلاعاتو او کلتور له رئیس ملا حمیدالله نثار سره په لیدنه کې د خپل سفر د موخې په اړه معلومات شريک کړل او زیاته یې کړه؛ دوی به د غزني د اطلاعاتو او کلتور رياست په موزیم کې هغه سلګونه قلمه تاریخي آثار چې له کلونو راهيسې د یاد موزیم په ډیپوګانو کې موجود دي، ثبت، سجل، وقایه او هغه تاریخي آثار چې ترمیم ته ضرورت لري، بیا ورغوي.
د اطلاعاتو او کلتور رئیس ملا حمیدالله نثار یاد پلاوي ته د ښه راغلاست ويلو تر څنګ وويل: دغه ریاست هر ډول همکارۍ او د آسانتیاو برابرولو ته چمتو دی.
د یادونې وړ ده چې همدا اوس د غزني په ملي موزیم کې سلګونه قلمه د مختلفو دورو تاریخي او کلتوري آثار موجود دي او هره ورځ لسګونه کسان له دغه موزیم څخه لیدنه کوي.
۱۴۴۵/۸/۲ هـ ق
۱۴۰۲/۱۱/۲۲ هـ ل
