په نورستان کې رضاکارو ځوانانو سره د همغږۍ ناسته ترسره شوه
د نورستان ولايت د اطلاعاتو او کلتور رياست د رئيس مولوي سميع الحق حق بیان په مشرۍ له يو شمېر رضاکارو ځوانانو سره د ځوانانو چارو امریت په همږغۍ مشورتي ناسته ترسره شوه.
یاده ناسته اطلاعاتو اوکلتور رياست کې جوړه شوې وه چې پکې د ټولو ولسواليو استازو برخه اخیستې وه.
په پیل کې اطلاعاتو او کلتور رئيس مولوي سميع الحق حق بیان ټولنه کې د ځوانانو په رول خبرې وکړې او ځوانان يې د ټولنې د ملا تیر او د وطن جوړوونکي وبلل، نوموړي وویل: یاده ناسته د ځوانانو ستونزو ته رسېدنې په موخه جوړه شوې ده، همدا راز يې د ځوانانو لپاره د ځوانانو چارو معينيت پروګرامونه او مسوولیتونه بیان کړل او په ځوانانو یې غږ وکړ، چې د خپلو ظرفیتونو لوړولو او ودې لپاره له مناسبو فرصتونو څخه ګټه واخلي.
په یاده ناسته کې یو شمیر رضاکارو ځوانانو د خپلو نظرونو شریکولو تر څنګ له اطلاعاتو او کلتور رياست څخه مننه وکړه او ډاډ يې څرګند کړ، چې هر ډول برنامو پلي کولو کې ورسره پوره همکار دي او ملاتړ یې کوي.
۱۴۴۶/۳/۲۸ هـ ق
۱۴۰۳/۷/۱۰ هـ ل
