په بغلان کې د اتحاد مجلې د بنسټ اېښودنې ۱۰۱ کلیزه ونمانځل شوه
تېره ورځ په بغلان ولایت کې د اتحاد مجلې د بنسټ اېښودنې ۱۰۱ کلیزه ونمانځل شوه، چې په دې اړه جوړه شوې غونډه کې د دولتي ادارو رئیسانو، شاعرانو او لیکوالانو ګډون کړی و.
د غونډې په پیل کې د اطلاعاتو او کلتور رئيس مولوي اسدالله مصطفى هاشمي، د چاپي رسنیو پر اهمیت خبرې وکړې او ويې ويل، اتحاد مجلې په هره ګڼه کې شاوخوا درې زره افغانۍ لګښت لري او هره میاشت نږدې ۶۰ زره افغانۍ د اعلاناتو له لارې د دولت بودجې ته جمع کوي.
ښاغلي رئیس زیاته کړه، دا مجله اوس مهال په میاشت کې دوه ځله خپریږي، مونږ هڅه کوو چې په نوي کال کې په اونۍ کې یو ځل خپره کړو.
ښاغلي رئیس وویل، اتحاد مجله په بغلان کې لومړنۍ فعاله چاپي رسنۍ ده، همدا راز د مجاهدینو له لوري د هیواد له فتحې وروسته هم د اتحاد مجلې خپل فعالیت ته دوام ورکړی دی.
ورپسې د اتحاد مجلې مسؤل سید عبدالله سادات د دغې چاپي رسنۍ فعالیت او رول مهم وباله او زیاته یې کړه، اتحاد مجله په څلورو مخونو کې د اسلامي، سیاسي، ټولنیزو، فرهنګي او ادبي موضوعاتو سره خپرېږي.
غونډه د هغو دولتي ادارو مسؤلینو ته د ستاینلیکونو په ورکولو سره پای ته ورسیده، چې ډیر پیرودونکي لري او د دوی له لارې دې مجلې ته اعلانونه لیږل کیږي.
۱۴۴۴/۸/۲۷ هـ ق
۱۴۰۱/۱۲/۲۹ هـ ش
