په لغمان کې د هنر نړېواله ورځ ونمانځل شوه
د لغمان د اطلاعاتو او فرهنګ ریاست نن په دغه ولایت کې د هنر نړېواله ورځ ونمانځله.
د باختر اژانس د سیمه ييز خبریال د خبر له مخې، په غونډه کې د اطلاعاتو او فرهنګ رییس اورنګ صمیم وویل چې هنر د فرهنګ یوه برخه ده او انسان باید په خپلو چارو کې له هنریت څخه کار واخلي.
صمیم وویل: ((انسانان ټول دي ،خو هغه چې ښه رویه، ښه چلند او ښه اخلاق لري او د ژوند په ټولو اصولو پوهېږي، دا هم یو هنر دی)).
د اطلاعاتو او فرهنګ رییس ځوانان وهڅول چې د لغمان له عامه کتابتون څخه ګټه واخلي، مطالعه وکړي او هم هنریت ته کار وکړي.
په همدې حال کې د ځوانانو په استازیتوب د ځوانانو د پارلمان وکیل حنیف الله پشه یي وویل: په هر کار کې چې هنریت موجود وي نو ارزښت پکې ډیر وي، پکار ده چې په ټولو چارو کې له هنریت څخه ګټه واخیستل شي.
په غونډه کې د لغمان ممثلانو یو تمثیل هم وړاندې کړ چې هنریت یې پکې رانغاړلی و.
د غونډې په پای کې د لغمان د اطلاعاتو او فرهنګ ریاست ځینې هنرمندان په ستاینلینکو هم ونازول.
مهترلام / د تلې ۲۰ مه / باختر
