د تخار ولايت اطلاعاتو او کلتور رياست د فکري جګړې تر سرليک لاندې سيمينار جوړ کړ

دتخار داطلاعاتو او کلتور رياست له لوري د فکري جګړې تر سرليک لاندې يو ورځنى سيمينار د دې ولايت د اطلاعاتو او کلتور د رئيس مولوي ذبيح الله انصاري، د ځوانانو چارو آمر، علماوو، د پوهنتونونو استادانو، ځوانانو او د رسنيو د استازو په شتون کې جوړ شو.
د تخار ولايت د اطلاعاتو او کلتور رئيس مولوي ذبيح الله انصاري فکري جګړه تر نظامي جګړې ډېره خطرناکه وبلله او زياته يې کړه؛ چې د دښمن په مقابل کې په نظامي جګړه کې د انسان بدن او ژوند له منځه ځي او فکري جګړه د مسلمانانو عقیده او ایمان له منځه وړي.
هغه همداشان زیاته کړه چې په مسلمانانو باندې لازمه ده چې د لویدیځوالو د شومو پلانونو څخه خبر شي او د غربیانو او د هغوی د متحدینو د شومو پلانونو د شنډولو لپاره متحد شي او دا شوم پلانونه شنډ کړي.
د پوهنتون استاد پوهاند کبیر هوتک د فکري جګړې په دې سیمینار کې د فکري جګړې موخې او زیانونه وڅیړل او ویې ویل؛ فکري جګړه د غرب یو فریب او درواغجن شعار دی. نوموړي له ځوانانو، د پوهنتون له استادانو او پوهانو وغوښتل، چې د ټولنې خلک د علم او پوهې په لور رهبري کړي.
د غونډې ګډونوالو د دغه ډول سیمینارونو په جوړیدو خوښي څرګنده کړه او ویې ویل: دا ډول سیمینارونه د ولس او اسلامي نظام په ګټه دي او د هیواد په وړاندې د غربیانو د ناوړو پلانونو د له منځه وړلو لپاره به هم ګټور تمام شي.

۱۴۴۶/۳/۲۸ هـ ق
۱۴۰۳/۷/۱۰ هـ ل