محمد طاهر زهير په هرات کې هنري او فرهنګي نندارتون پرانيست
د اطلاعاتو او فرهنګ وزارت سرپرست محمد طاهر زهير نن د کتاب، د ميناتورۍ د آثارو او د لاسي صنايعو نندارتون د هرات د اطلاعاتو او فرهنګ رياست په انګړ کې پرانيست.
دغه نندارتون د اميرعلي شېرنوايي د زيږېدو د۵٨٠ مې کاليزې او د اميرعلي شېرنوايي افکارو ته د نوې کتنې نړيوال سيمنار د جوړېدو په مناسبت د هرات د اطلاعاتو او فرهنګ رياست په انګر کې جوړ شوى دى.
په دغه نندارتون کې په بېلابېلو عنوانونو په تېره بيا د هرات د تاريخ په اړه کتابونه، د ميناتورۍ آثار او لاسي صنايع نندارې ته وړاندې شوې دي.
محمد طاهر زهير د هرات له اطلاعاتو او فرهنګ رياست څخه د دغه نندارتون د جوړولو په خاطر مننه وکړه او نندارې ته وړاندې شوي آثار يې د دغه ولايت د هنرپالو هنرمندانو، ليکوالو او صنعتکارانو د هنر او لوړ کار سمبول وباله.
دغه نندارتون يوه اوونۍ د مينه والو پرمخ پرانيستی دى.
کابل/ د وري ۱۹ مه/ باختر
